Pemirsa kenal dengen ayam berugo, atau biaso jugo disebut ayam bekisar. nah, ayam yang dikenal punyo suaro kokok yang bagus ini, selaen bebentuk cindo, ternyato pacak jugo di jadike ayam aduan, atau ayam kontes. hargo ayam ini, berkisar mulai dari 250 ribu sampe jutaan piah, tergantung kualitas ayamnyo.
Ayam berugo, siapo yang idak tau. salah sikok jenis ayam aes, yang dikenal punyo suaro kokok yang bagus. nah, salah sikok penjual ayam berugo ini, iolah mangcek muhammad candra, atau lebih akrab dipanggik mangcek candra, yang sudem lebih dari 5 taon bejualan ayam, khusus ayam jenis berugo.
Ciri khas yang paling mudah dikenali dari ayam berugo ini, iolah warno putih, yang ado dibagian jenggernyo. selaen itu, warno jenis ayam berugo ini, didominasi oleh warno merah hati, dengan bulu ekor bewarno lebih gelap, atau hitam.
Tinggi punggung rato-rato ayam berugo besak, berkisar antara 15 sampe 25 senti meter. semakin pendek atau semakin kecik ukuran ayam barugo, biasonyo hargonyo jugo lebih mahal. apolagi kalu bulu ekor belakangnyo lebih panjang. biasonyo jugo berego mahal. kualitas kontes biasonyo punyo ciri khusus bentuk ukuran yang lebih kecik, bebulu halus, samo ekor yang panjang.
Mangcek candra ngakui, kalu ayam-ayam berugo yang dijualnyo ini, berasal dari persilangan antara ayam bekisar jawo, dengan ayam hutan dari daerah sumatera selatan. ayam hutan daerah sumatera selatan biasonyo didatengke dari bemecem kabupaten, diantaranyo daerah lubuk linggau atau kabupaten musi rawas, samo daerah tanjung raja samo indralaya.
Nah, buat menui kebutuhan paro pehobi ayam berugo ini, selaen bejualan dipasar, mangcek candra jugo ngembangke ternak ayam berugo di rumahnyo.
Nah, selaen bejualan dipasar, sekali-sekali mangcek candra ini beburu ayam hutan, yang bentuknyo mirip dengen ayam berugo. biasonyo, mangcek candra ngunoke perangkap pecak ini, yang khusus dibuat sebagai alat perangkap ayam hutan.
